A visita do Basque Culinary Center á D.O. Rías Baixas culmina hoxe cun showcooking


28 de marzo de 2019.- 106 alumnos e alumnas do Basque Culinary Center, acompañados por cinco profesores, finalizan hoxe a súa experiencia na Denominación de Orixe Rías Baixas. Con esta visita chégase á oitava ocasión na que o estudantado do primeiro curso do Grao en Gastronomía e Artes Culinarias acode a Rías Baixas para coñecer ‘in situ’ os seus viños, ao mesmo tempo que se reafirma a boa relación existente entre esta Denominación de Orixe e a universidade vasca.

A viaxe pola Denominación de Orixe Rías Baixas iniciouse onte con percorridos por distintas adegas das subzonas do Condado do Tea e do Rosal. A xornada de hoxe continuou coa visita a adegas do Val do Salnés. O alumnado do Basque Culinary Center percorreu un total de doce adegas e ademais tivo a oportunidade de coñecer o museo Arabo, as pesquerías da lamprea e unha cetárea, así como ver unha batea.

Esta experiencia serviulles para coñecer de primeira man o proceso de elaboración dos viños da Denominación de Orixe Rías Baixas, así como os distintos matices que se poden distinguir entre unhas referencias e outras. Todo isto acompañado polas indicacións dos adegueiros e os enólogos, que lles proporcionaron o seu primeiro contacto directo co sector vitivinícola. Tamén tiveron ocasión de visitar o viñedo e de poder ver os diferentes sistemas de emparrado e o momento no que se atopan as vides.

A expedición culmina no serán co habitual showcooking de produtos galegos con distintivo de calidade, harmonizados cun total de 35 marcas de viño da Denominación de Orixe Rías Baixas. Esta sesión será dirixida por Pepe Solla, cociñeiro do Grupo Nove, que estará acompañado por outros chefs galegos.

Precisamente nesta actividade haberá unha gran implicación por parte do alumnado do Basque Culinary Center. "Participarán na elaboración de pratos tradicionais da gastronomía galega a partir de produtos de primeira calidade”, explica Mikel Zeberio, docente da facultade. Entre eles están queixos e pan con con D.O.P., conservas gourmet, mexillóns, polbo e incluso cacheira. Para iso, o alumnado divídese en grupos de doce persoas para así colaborar na elaboración e presentación das distintas propostas gastronómicas, así como no servizo dos viños da Denominación de Orixe Rías Baixas. “A idea é que os grupos vaian rotando para poder experimentar todos cos distintos tipos de produtos”, engade.

Ao acto asistirán representantes do pleno do Consello Regulador, así como os deputados provinciais Santos Héctor Rodríguez, responsable da área de Promoción Turística, e Javier de Dios, ao cargo da área de Innovación e Promoción Económica; así como a directora de profesionalización de Turismo de Galicia, Marta Fernández.

Distintas nacionalidades

A expedición do primeiro curso do Grao en Gastronomía e Artes Culinarias do Basque Culinary Center está composta por 106 estudantes de distintas nacionalidades como Colombia, Corea, Ecuador, Italia, México ou Vietnam.

Mikel Zeberio amosa a súa satisfacción coa viaxe á Denominación de Orixe Rías Baixas “porque esperta o interese dos alumnos tanto pola gastronomía galega a través de produtos de gran calidade como polo mundo dos viños da  man de Rías Baixas”. Unha curiosiodade que queda patente coa alta participación e as preguntas prantexadas polo alumnado en todas as visitas a adegas. “O noso obxectivo é espertar neles ese punto de paixón ante o mundo dos vinos e que tamén aprecen o amplo abano de posibilidades que este sector lles ofrece. Degustaron distintas elaboracións, con lías e sen lías, por exemplo, ademais de ver as diferenzas entre viños de distintas subzonas”, concreta.

Como complemento á profundización sobre os viños de Rías Baixas, tamén se atopan as harmonizacións con outros pratos típicos da gastronomía galega. Neste sentido, Zeberio destacou a degustación realizada onte en Arbo de dúas elaboracións distintas con lamprea -en fritura e á arbolense-.

Unha experiencia que “todos lembrarán con moito agarimo, tal como o fan os estudantes que xa finalizaron o grao", conclúe Mikel Zeberio. Alumnado e profesorado do Basque Culinary Center regresarán mañá a San Sebastián.