OS VIÑOS DA DENOMINACIÓN DE ORIXE RÍAS BAIXAS CÁTANSE ESTES DÍAS NA FEIRA PROWEIN 2023

Os viños de Rías Baixas están presentes estes días na Feira Internacional de Viños e Bebidas Espirituosas ProWein. Unha edición máis, o stand do Consello Regulador está emprazado no pavillón internacional do ICEX e alberga un túnel do viño con 94 marcas pertencentes a 54 adegas. O devandito espazo de cata acolle unha gran variedade de marcas e de tipoloxías de viños da denominación.  Ademais, o stand de Rías Baixas tamén conta cunha zona ocupada por 11 adegas que acoden á feira como coexpositoras.

O Consello Regulador está representado no recinto feiral de Messe, en Düsseldorf (Alemaña), polo secretario xeral e a directora do Departamento de Marketing, Ramón Huidobro e Eva Mínguez, quen recibiron onte a visita do conselleiro do Medio Rural, José González, e do  director da Axencia Galega de Calidade Alimentaria (AGACAL), José Luis Cabarcos.

Profesionais de todo o mundo participan nesta cita, considerada unha das máis importantes a nivel internacional, que abriu as súas portas o pasado domingo e as pechará mañá martes. A previsión da organización é contar con 6.000  expositores de máis de 60 países nestes 28 anos de traxectoria.

Mercado alemán

Alemaña está situada dentro do top-ten de principais mercados de exportación da Denominación de Orixe Rías Baixas durante o exercicio de 2022. O pasado ano exportáronse a ese país máis de 220.000 litros de viños de Rías Baixas. A importancia deste mercado fai que conte cun plan promocional específico que este Consello Regulador desenvolve no devandito país dende hai anos.