O domingo daranse a coñecer os premiados da XXXIV Cata Concurso Rías Baixas Albariño

Un total de 54 viños albariño Rías Baixas da anada 2021, que foi cualificada polo pleno do Consello Regulador como “boa”, foron catados onte e hoxe, na XXXIV Cata Concurso Rías Baixas Albariño, que se desenvolve no Parador de Cambados.

Un panel de 24 expertos levou a cabo a Cata Derradeira, esta mañá no Salón Bazán. Así, hoxe decidiron os 3 Albariño Rías Baixas 2021 gañadores de entre as 12 mostras finalistas. Daranse a coñecer este domingo 7 de agosto durante a comida Oficial do Albariño, no parque de Torrado.

Cabe lembrar que este xurado establece as puntuacións dos viños segundo a normativa da Organización Internacional do Viño (OIV).

En xeral, todos os catadores puxeron de manifesto a “dificultade” á hora de escoller os finalistas, debido á calidade das mostras. Así o manifestou o catador Bartolomeu Gómez, que se estreaba neste concurso: “A calidade” dos viños presentados ao certame fai “difícil escoller entre os máis de 50 presentados”. Nesta liña, a catadora Silvia García resaltou que nesta Cata Derradeira “ao estar o mellor dos mellor” é “moi difícil” escoller os premiados.

Algúns profesionais tamén falaron das calidades dos viños Rías Baixas, encomiando a “excepcionalidade” das súas cores. Foi o caso da xornalista e catadora Patricia Rexedor, que fixo fincapé no “igualadas” que estiveron as mostras finalistas.

Pola súa banda, o comunicador e catador José Ignacio Junguitu destacou en primeiro lugar como “Rías Baixas é quizá a zona de viños brancos máis importantes de España”. Tamén cualificou de “espectacular” a evolución dos seus viños.

Por último, o xornalista Carlos Iserte fixo mención ao éxito da variedade albariño “polos homes e mulleres do campo, que souberon traballalo ben”. En relación á festa, declarada de interese turístico internacional, “coñezo moitas festas do viño, pero na de Cambados é onde realmente gózase do viño e da súa cultura”.