O TÚNEL DO VIÑO DUPLICA O NÚMERO DE PARTICIPANTES E AFIÁNZASE COMO UNHA DAS ACTIVIDADES CON MAIOR PROXECCIÓN DA FESTA DAS ALBARIÑO RÍAS BAIXAS

Puerta Santa foi a marca gañadora da XXXV Cata Concurso Rías Baixas Albariño; Pazo de Rubianes obtivo a Medalla de Prata e Bouza do Rei o Bronce

A XII Edición do Túnel do Viño, organizada polo Consello Regulador, mantense como un dos pratos fortes da LXXI Festa do Viño Albariño Rías Baixas en Cambados. Foron moitos os amantes do viño, unhas 1000 persoas, as que se achegaron entre o xoves 3 e o sábado 5 de agosto ao Salón de Congresos e Exposicións José Pena para degustar algunhas das 164 marcas das 66 adegas expostas. De feito, duplicouse a participación con respecto ao ano anterior.

A directora do Departamento de Marketing, Eva Mínguez, mostrou a súa satisfacción pola resposta positiva do público a esta actividade xa consolidada dentro da Festa do Viño Albariño D.Ou. Rías Baixas: “é unha acción totalmente consolidada dentro do programa da festa. Conta con numerosos visitantes, que se achegan desde distintos puntos da xeografía española para catar a anada en curso e as diferentes elaboracións das adegas da denominación de orixe Rías Baixas”.

XXXV Cata Concurso Rías Baixas Albariño

Outro dos momentos máis destacados da fin de semana foi a XXXV Cata Concurso Rías Baixas Albariño durante a que se elixiu o mellor albariño Rías Baixas da Anada 2022. A Medalla de Ouro recaeu en Puerta Santa (de Adegas Morgadío, S.L), mentres que a de Prata foi para Pazo de Rubianes 2022 (de Pazo de Rubianes, S.L) e a de Bronce, para Bouza do Rei 2022 (de Bouza do Rei, SAT).

Nesta trixésimo quinta edición da Cata Concurso participaron un total de 55 marcas de Albariño Rías Baixas da anada 2022. Estas foron analizadas por 24 expertos catadores. En xeral, todos os catadores destacaron a “a boa organización e o desenvolvemento da Cata Concurso”. Para Pepe Ferrer, xornalista e colaborador en Canle Sur Radio e embaixador dos viños de Xerez “foron un #gozar” á vez que “un reto como catador porque ao tratarse de viños monovarietales da mesma anada e co mesmo perfil, dalgunha maneira forza a que o catador teña que afinar moito para atopar a singularidade, o que destaca en cada viño”.