OS VIÑOS DE RÍAS BAIXAS CONSIGUEN 221 PREMIOS EN CONCURSOS NACIONAIS E INTERNACIONAIS DURANTE 2022

Os viños da Denominación de Orixe Rías Baixas sumaron 221 galardóns na súa participación en concursos enolóxicos nacionais e internacionais durante 2022. Os premios obtivéronse en 11 citas establecidas no calendario oficial da Organización Internacional da Viña e o Viño (OIV) ás que concorreron as distintas adegas adscritas á denominación desde xaneiro ata decembro de 2022.

Do conxunto de galardóns, 8 son da categoría Gran Ouro ou Platino, 69 da de Ouro, 72 de Prata, 71 de Bronce e un trofeo. Os viños de Rías Baixas destacados corresponden na súa maioría á anada 2021, cualificada como ‘Boa’, aínda que nos últimos anos pódese observar un incremento das distincións ás anadas máis antigas, que cada vez máis chaman a atención dos xuíces.

Entre os mellores viños brancos do mundo

Estes premios nos máis prestixiosos concursos internacionais corroboran o posicionamento dos viños de Rías Baixas como uns dos mellores brancos do mundo. Así, en España obtiveron moi bos resultados en concursos consolidados como os organizados pola Unión Española de Catadores (UEC): os Bacchus 2022, que premiaron a 24 Rías Baixas (1 Gran Bacchus de Ouro, 16 Bacchus de Ouro e 7 de Prata) e os Baco, onde conseguiron 22 galardóns (2 Gran Baco de Ouro, 16 Bacos de Ouro e 4 de Prata). Por outra banda, os Vin España, concurso nacional de viños organizado pola Federación Española de Enoloxía, outorgaron ás marcas da D.O. Rías Baixas un total de 14 premios: 4 gran ouros, 5 ouros e 5 pratas.

A nivel internacional, os viños Rías Baixas conseguiron 73 galardóns nos Decanter World Wine Awards (5 ouros, 27 pratas, 40 bronces e 1 platino), aos que se suman tamén as 35 medallas e 1 trofeo do International Wine Challenge (4 ouros, 14 pratas e 16 bronces).

Outros concursos internacionais que premiaron aos viños da Denominación de Orixe Rías Baixas son: o Challenge International du Vin, con 2 premios (2 ouros); o Concurso Mundial de Bruxelas, con 12 galardóns (7 ouros e 5 pratas); o Asia Wine Trophy, con 2 trofeos (2 ouros); o Mundus Vini, con 14 premiados (9 ouros e 5 pratas) e o IWSC International Wine & Spirit Competition, con outros 19 premios (4 pratas e 15 bronces). A presenza destes viños por todo o mundo queda constatada coa súa participación tamén en Citadelles du Vin, con 4 medallas (3 ouros e 1 prata).

A tendencia observada nos certames internacionais dos últimos anos é un incremento nos premios das anadas lonxevas, aínda que seguen abundando os viños do último ano, neste caso 2021. De feito, entre as marcas de Rías Baixas galardoadas atópanse anadas do 2013, 2015, 2016, ata a do 2021. Cabe destacar dúas Espumosos Rías Baixas de 2021, que recibiron Medalla de Ouro no Challenge International du Vin, os dous Gran Ouros para as anadas 2016 e 2018 nos Vin de España e o Platino para unha anada 2018 nos Decanter World Wine Awards.