3 de agosto de 2018.- 58 marcas da Colleita 2017 participarán na XXX Cata Concurso Rías Baixas Albariño, que terá lugar no Salón Bazán do Parador de Cambados durante o sábado 4 e o domingo 5 de agosto, enmarcada dentro das actividades da LXVI Festa do Viño Albariño Denominación de Orixe Rías Baixas.
A Cata Concurso Rías Baixas Albariño comezará mañá sábado ás 10:00 horas coa denominada Cata Prima. O panel de cata dividirase en dous para avaliar todos os viños, que serán puntuados segundo a normativa da Organización Internacional do Viño (OIV). Os doce ou catorce (dependendo da decisión do xurado) mellores viños pasarán á Cata Derradeira, que se celebrará ao día seguinte, o domingo, ás 11:00 horas. Dela sairán os tres viños premiados, que os situarán entre os mellores Rías Baixas Albariño da Colleita 2017. Os premios serán entregados durante o almorzo oficial do Capítulo Serenísimo, que terá lugar o propio domingo no Pazo de Torrado.
Esta Cata Concurso, organizada polo Consello Regulador da D.O. Rías Baixas, contará cun panel de cata integrado por 21 expertos, pertencentes tanto ao panel de cata interno do Consello como a un externo, disposto para a ocasión.
Os catadores externos desprazados para a cita son os seguintes: Salvador Manjón (director de La Semana Vitivinícola, asesor da Fundación FIVIN e do Foro Mundial del Vino de La Rioja. Catador, forma parte do xurado dos Premios Baco); Almudena Martín (responsable de área de Wines From Spain do ICEX, así como da promoción de Vinos de España no ámbito internacional); Ricardo Galeote (xornalista de viños en Diario Sur, na revista Solwines, no prestixioso periódico ruso MK-Huboct e na revista rusa Marbella 24); José Luis Contreras (fundador de Verema, doutor universitario de economía aplicada, especializado en economía do viño); Ramón Francás (xornalista especializado en viticultura no periódico La Vanguardia, el Garraf, e o Alt Penedés); Laura Sánchez (redactora de gastronomía e viño na Guía del Ocio e redactora de contidos gastronómicos para a revista Gourmet Magazine de El Corte Inglés); Yolanda Barahona (enóloga, sumiller e integrante do comité de cata do grupo Gourmet); Jesús Flores (enólogo e crítico de viños, director de Aula Española del Vino, Premio Nacional de Gastronomía e profesor de cata do Curso de Sumilleres da Cámara de Comercio de Madrid); Juan Manuel Ruiz (xornalista experto en viño, colabora con diversos medios especializados en viño e gastronomía e é xurado de cata de concursos vinícolas nacionais e internacionais); Alfonso Gutiérrez (membro do comité de cata do Grupo Gourmets, director do restaurante El Pelícano Meliá e sumiller).
