O CONSELLO REGULADOR RÍAS BAIXAS PREVÉ, SEMPRE QUE AS CONDICIÓNS METEOROLÓXICAS SEXAN PROPICIAS, RECOLLER 41 MILLÓNS DE QUILOS DE UVA ESTA COLLEITA

30 de xullo de 2024.- O Órgano de Control e Certificación da Denominación de Orixe Rías Baixas presentó hoxe ao Pleno do Consello Regulador o Informe de Estimación da Colleita 2024. O devandito documento, que recolle a situación do viñedo ata a primeira quincena de xullo, estima para este ano unha recollida de “41 millóns de quilos de uva, o que significa un 7,5% menos que a colleita do ano pasado, e un rendemento máis baixo de produción de 8.871 kg por hectárea”. Durante o Pleno explicouse que este ano os acios son máis pequenos e que o ciclo vitícola vai algo máis atrasado co ano pasado debido á ralentización do viñedo polas condicións meteorolóxicas de finais de maio e da primeira quincena de xullo, con temperaturas frías ou moderadas para a época.

En canto á data de inicio da vendima, o informe prevé que se produza ao longo dos dez primeiros días de setembro, “dependendo de como se desenvolva o mes de agosto”. Como sinalan dende o Departamento Técnico, o envero comezou a semana do 22 ao 28 de xullo. Na produción prevista para esta campaña inflúe en boa parte o incremento de 134 hectáreas en 2024 e unha taxa de brotación do 92,7%, algo superior ao ano pasado, se ben o índice de fertilidade foi inferior, con 2,2 acios xema/ brotados. As mermas atribuídas estímanse nunha media do 16% e producíronse especialmente por corremento de flor e, en menor medida, por plagas e enfermidades, especialmente o mildio larvado.

O devandito documento lembra como foi o ciclo vitícola en 2024, “cun inverno moi cálido e húmido; unha primavera cálida e moi húmida, así como un mes de xuño normal e húmido”.

Para a elaboración deste documento, o Departamento Técnico do Consello Regulador basouse na información proporcionada por técnicos de campo das adegas da Denominación de Orixe, que supervisan o 45% da superficie produtiva. En total, realizáronse 43 enquisas a 32 técnicos que asesoran viñedos nas distintas subzonas. Unhas enquisas moi detalladas, unha vez superado o momento máis crítico do ciclo vitícola, cuxa información foi posteriormente contrastada en campo e ponderada estatisticamente coa fin de unificar criterios.

Na actualidade, este Consello Regulador conta con 177 adegas inscritas. A superficie desta Denominación de Orixe abrangue 4.626 hectáreas, aumentando en 134 hectáreas, repartidas entre 23.792 parcelas nas que traballan 5.038 viticultores.