Volver

06 de Febreiro

O CRDO Rías Baixas organizou 125 actividades promocionais a nivel nacional e internacional en 2017, que chegaron a máis de 7.400 profesionais

6 de febreiro de 2018.- O Consello Regulador da D.O. Rías Baixas fai un balance moi positivo do resultado das súas actividades de promoción dos seus viños, desenvolvidas tanto a nivel nacional como internacional, así como da súa presenza mediática durante o pasado ano 2017. As 125 actividades promocionais organizadas polo Consello Regulador en 2017 chegaron a 7.447 profesionais do sector. Nelas participaron 275 marcas diferentes, pertencentes a 96 adegas desta denominación.

O mercado nacional sumou 2.600 asistentes, repartidos en salóns do viño, presentacións e túneles do viño levados a cabo en cidades como Barcelona, Xixón, Xirona, Palma de Mallorca, Vigo ou Cambados. Pola súa banda, os asistentes ás actividades internacionais foron 4.887, que se repartiron en 2.450 nas máis importantes feiras internacionais (Prowein, London Wine, Vinexpo Bordeus, Hong Kong International W& S, Great Match, Aspen Food & Wine, Three Wine Men Cardiff, Cambridge, Leeds e Londres, así como WINE GANG en Leeds); 535 participantes en showrooms en Leeds, Gante e México; e 1.804 profesionais acudiron ás catas e seminarios en Alemaña, BENELUX, Estados Unidos, Irlanda, Xapón, México, Polonia e Reino Unido.

Finalmente, un total de 88 catadores, xornalistas especializados en viños ou de lifestyle, educadores de viño, distribuidores e importadores visitaron a Denominación de Orixe Rías Baixas nas catorce misións inversas que se organizaron durante o pasado ano.

Comunicación
Así mesmo, esta Denominación situouse como cuarta denominación de orixe vinícola española con maior presenza informativa en 2017, escalando un posto con respecto a 2016 segundo un recente informe elaborado polo consultora Castro Galiana. Este estudo apunta que a presenza da D.O. Rías Baixas, as súas adegas e marcas na prensa de 2017 foi próxima ao 7%, incrementando as súas aparicións nun 1% e superando á Denominación de Xerez. Preto de 200 millóns de lectores tiveron o ano pasado máis de 40 millóns de exemplares de diarios ou revistas que contiñan noticias desta denominación de orixe, as súas adegas e marcas.

As noticias relativas ao Consello Regulador, ás adegas e ás marcas de Rías Baixas representaron o 7% do conxunto de informacións sobre viños con denominación de orixe de España, quedando só por diante as denominacións de orixe Rioja (22,45%), Ribera del Duero (8,39%) e Cava (7,15%). Ademais, nos meses de maior actividade no sector vitivinícola, Rías Baixas mesmo mellora as súas posicións. Así, en xuño, xullo e agosto foi a segunda denominación de orixe, cunha notoriedade mediática que nalgúns momentos superou o 13% sobre o conxunto, mentres que en meses como febreiro e setembro foi a terceira.