OS VIÑOS DE RÍAS BAIXAS MANTEÑEN UN BO POSICIONAMENTO NO MERCADO NACIONAL NUN 2023 CONVULSO

Os viños de Rías Baixas mantiveron un bo posicionamento no mercado nacional durante o último exercicio, no que mostran especialmente a súa fortaleza en valor. España viviu unha retardación no consumo de viño con DO este último ano. É unha das conclusións que lanza o informe da Consultora NielsenIQ de setembro de 2023, presentado a máis de 80 profesionais do sector de Rías Baixas.

Os viños con Denominación de Orixe diminuíron as súas vendas na canle de alimentación e hostalería nun 2,4% en volume, mentres que en valor aumentaron un 5% as súas vendas pasando dos 2.142 Millóns de Euros aos 2.250 Mill. de € en ambas as canles entre o ano pechado a setembro 2022 e o pechado a setembro de 2023.

Pola súa banda, Rías Baixas situouse como o segunda D.O. de España en valor de vendas de viño branco con Denominación de Orixe nas canles de alimentación e hostalería, manténdose como a terceira no caso de volume de vendas. Se ampliamos estes datos ao segmento de viño con Denominación de Orixe, Rías Baixas ocupa o cuarto lugar no TOP 10 de DO de España en cota de valor, e o oitavo no caso de volume de vendas.

Segundo explica o informe desta consultora, as áreas con maior venda dos viños de Rías Baixas son o Noroeste de España (Galicia, Asturias e León), seguidas polo Leste (Comunidades de Valencia e Murcia, así como Albacete), o Sur de España (Andalucía, Sur de Estremadura) e as áreas metropolitanas de Barcelona e Madrid.

A confianza do consumidor nos viños de Rías Baixas queda patente en 2023 coa comercialización de 35.044.689 botellas, equivalentes a 26.283.517 litros, en todos os mercados. Desta produción, o 29,64% destinouse aos mercados internacionais, onde o prezo medio exworks foi de 7,78 € o litro. Con Estados Unidos e Reino Unido á cabeza en volume e valor, o continente americano é o que máis viño importa desta denominación de orixe galega.