Viños da D.O. Rías Baixas reciben tres premios obtidos en catas-concurso en Euskadi

10 de setembro de 2018.- Tres viños da Denominación de Orixe Rías Baixas recibiron este mediodía os premios logrados nas catas-concurso organizadas pola Casa de Galicia en Bilbao e pola Irmandade de Centros Galegos en Euskadi. A entrega efectuouse no Pazo de Mugartegui, sé do Consello Regulador de Rías Baixas, coa presenza de José David Fidalgo, organizador das catas, e de Eva Mínguez, directora de mercadotecnia de Rías Baixas.

Na vixésima edición da cata concurso ‘Viños Brancos Galegos’ da Casa de Galicia en Bilbao, o primeiro premio recaeu no viño D.O. Rías Baixas Tollodouro 2017, de Adegas Tollodouro, da subzona do Rosal. O segundo clasificado foi o D.O. Rías Baixas Casa do Sol 2015, de Adegas Solagra, da subzona de Ribeira da Ulla.

Pola súa parte, na décima oitava cata-concurso ‘Viños Tintos Galegos’, da Irmandade de Centros Galegos en Euskadi, o Rías Baixas Daínsua 2017, de Adega José Carlos Quintas, logrou un accésit. As dúas catas-concurso contan coa colaboración da Asociación de Euskadi de Sumilleres e desenvolvéronse durante o pasado mes de xuño.

O Consello Regulador da D.O. Rías Baixas agradece o labor de promoción dos viños galegos que efectúan a Casa de Galicia en Bilbao e a Irmandade de Centos Galegos en Euskadi mediante catas-concurso con profesionais da sumillería que desenvolven desde hai xa dúas décadas.