36 profesionais participan no primeiro evento organizado pola D.O. Rías Baixas en Santo Domingo


A D.O Rías Baixas organizou onte o seu primeiro acto promocional en República Dominicana. Ata alí desprazáronse o secretario xeral do Consello Regulador, Ramón Huidobro, e a directora de marketing, Eva Mínguez. Con esta primeira actividade presencial á que acoden representantes do Consello reactívase o seu calendario promocional. Nesta comida participaron un total de 14 adegas e 36 profesionais do sector, entre os que se atopaban relevantes importadores, catadores, tendas gourmets, así como influencers e medios especializados.

O acto, ao que acudiron o embaixador de España en República Dominicana, Antonio Pérez-Hernández e Torra, así como a conselleira da Oficina Comercial Española en Santo Domingo, Clara Fernández, consistiu nun xantar maridaxe con comida local no restaurante  MARACA de Santo Domingo. A comida iniciouse cuns aperitivos, que estiveron acompañados por dez marcas da denominación, mentres que os catro pratos seguintes que formaron parte do menú  maridaron con outros catro viños. Nesta primeira ocasión participaron aquelas adegas que xa dispoñen de importador no devandito país.

Os representantes do Consello Regulador aproveitaron para facer unha prospección de mercado para coñecer de primeira man a introdución dos viños de Rías Baixas en Santo Domingo.   

A elección deste mercado como potencial débese ao bo comportamento das súas exportacións durante os últimos anos. Especialmente destacan as cifras da campaña 2020/21, onde as vendas a República Dominicana aumentaron un 93,65%: pasando de 80.825 litros a 156.524  l. Ademais, tiveron un comportamento similar tamén en valor, onde este mercado pasou de 574.796 € na campaña anterior a 1.102.076 €, un 91,73%. De feito, devandito país xa ocupa a undécima posición na clasificación de exportacións.